A presidenta do PP de Vigo, Luisa Sánchez, fixo un chamamento para que os vigueses participen este mércores na concentración convocada pola FEMP ás 20.00 horas fronte ao Concello, “para mostrar a súa solidariedade e apoio a Ceuta” e contra a xestión do Goberno central nesta crise.

Nun comunicado, a líder dos ‘populares’ vigueses sinalou que non se pode permanecer “á marxe” ante o que ocorre na Cidade Autónoma, polo que pediu trasladar o apoio aos ceutíes “e reclamar ás autoridades competentes que sexan áxiles para que a normalidade regrese canto antes ás rúas”. “O Goberno de Pedro Sánchez ten unha dobre e gran responsabilidade: debe asumir as súas competencias no control fronteirizo e por suposto dar resposta á dramática situación que se vive na cidade autónoma”, remarcou Sánchez.

Por todo iso, confirmou que o PP de Vigo secundará a convocatoria que a FEMP fixo para concentrarse en todos os municipios. Así mesmo, avanzou que o seu grupo rexistrará nas próximas horas unha declaración institucional sobre esta grave crise para a súa inclusión na orde do día do pleno municipal do próximo luns.