O Concello de Vigo fixo público un aviso este martes para informar de que non está recomendado o baño na praia da Punta, no barrio de Teis, nin tampouco na zona central da praia de Samil, tras detectarse “contaminación microbiológica”. Así, o goberno local fixo público un conciso comunicado no que informa de que, “neste momento”, non é recomendable bañarse nesas zonas por detectarse ese episodio de contaminación, “producida polas intensas choivas sufridas”.

Dáse a circunstancia de que este verán os areais de Vigo e a súa área sufriron varios episodios de contaminación e tiveron que ser pechados ao baño. No caso da cidade olívica, a praia da Punta, mantivo a recomendación de non bañarse durante unha semana, a mediados de agosto; e tamén houbo peches nos areais de Alcabre e A Fontaíña, e en Rodas e Figueras, nas Illas Cíes.