O alcalde de Vigo, Abel Caballero, celebrou que o Ministerio de Dereitos Sociais seleccionou o proxecto ‘Vigo Social Televisión’ como un dos 35 máis innovadores para mellorar a calidade de vida das persoas maiores en situación de dependencia e soidade non desexada. “O único proxecto seleccionado en Galicia, medio millón de euros de apoio e é unha plataforma televisiva que beneficiará directa e indirectamente a unhas 1.500 persoas maiores”, afirmou Caballero nun audio difundido aos medios de comunicación.

Segundo explicou o rexedor, “consiste nunha plataforma interactiva, accesible, fácil de usar, con intervención profesional en psicoterapia e terapia ocupacional”. Concretamente, é un dispositivo que se conecta á televisión e permite acceder a unha canle de actividades con contidos culturais, exercicios, relación con familias e amigos, canle de saúde e actividades de formación.

Ademais, apuntou o mandatario local, tamén incorpora seguimento de psicoterapeutas que “lles axudarán a xestionar as súas emocións e estar máis atendidos”. “É unha parte moi importante que foi o máis valorado do proxecto”, subliñou.