O grupo municipal do PP en Vigo denunciou este xoves a falta de información do goberno de Abel Caballero sobre o estado de tramitación do plan municipal contra as inundacións, a pesar de que este debería entrar en vigor en 2022 e de que o propio PXOM recolle zonas de alto risco de inundacións. Nun comunicado, o portavoz municipal ‘popular’, Miguel Martín, lamentou o “silencio” do goberno e o “nulo interese” por esta ferramenta, e esixiu que se aclaren os prazos para a súa entrada en vigor, xa que Vigo é un dos 51 municipios que está obrigado legalmente a contar con este documento.
Así, medio centenar de puntos do centro urbano presentan risco alto de inundación, entre os que están Areal, Balaídos ou Beiramar, e Miguel Martín preguntou a Abel Caballero “a que espera para tomar medidas”. “Agora xa está en vigor o novo PXOM, así que non ten escusas para seguir dilatando este documento tan necesario”, apuntou. Por outra banda, tamén se referiu a outro “incomprensible atraso”, o da tramitación dun novo Plan Municipal de Emerxencias, xa que o actual ten máis de 15 anos.
O PP explicou que Vigo só conta cunha guía de resposta que data de 2007 e réxese polo plan autonómico Inungal, actualizado en outubro de 2024. “Desde entón, foron varios os requirimentos da administración autonómica para que Vigo cumpra coas súas obrigacións e achegue un documento específico e non foron poucas as veces que se tivo que activar a fase de preemerxencia ante os frecuentes episodios de desbordamento do río Lagares“, sinalaron fontes ‘populares’.
