Axentes da Policía Local de Vigo detiveron a un home de 27 anos por vulnerar por segunda vez unha orde xudicial de afastamento da súa exparella. Os feitos tiveron lugar na tarde deste martes. Unha dotación policial que realizaba un control de estacionamento na rúa Urzaiz observou ao home, xa coñecido polos axentes de intervencións anteriores, nun comercio en compañía dunha muller.

A Policía tiña coñecemento de que, esa mesma mañá, xa se celebrara unha vista xudicial por dilixencias previas, precisamente por vulnerar a orde de afastamento da súa exparella. Ao comprobar a identidade da muller no comercio, os axentes confirmaron que se trataba da vítima da que tiña que permanecer afastado.

Tras cotejar os datos de forma telemática, os axentes comprobaron que o home ten en vigor unha prohibición de achegarse a menos de 200 metros da muller e do seu domicilio, así como a prohibición de comunicarse con ela. Estas medidas foron acordadas polo Xulgado de Violencia sobre a Muller de Vigo, polo que os policías procederon á detención do home.