O conselleiro de Educación, Román Rodríguez, destacou este venres que o alumnado galego adoita acadar bos resultados en informes internacionais como PISA, pero non tanto na Proba de Acceso á Universidade (PAU), o que atribuíu a unha maior esixencia e coherencia no sistema educativo galego fronte a outras comunidades que, ao seu xuízo, “reducen a calidade”. Así o afirmou antes dun acto en Vigo, ao ser preguntado polas mellores notas da PAU que obteñen estudantes doutras comunidades que logo acceden a prazas universitarias en Galicia.
Segundo un informe estatal recente, Galicia situouse o ano pasado como a quinta comunidade con peor media na fase xeral da selectividade, cun 6,87, só por diante de Canarias, Comunidade Valenciana, Cataluña e Baleares. Neste contexto, Rodríguez insistiu na necesidade de avanzar cara a unha PAU “máis homoxénea e común”, malia a oposición do Goberno central. Defendeu que esta reforma permitiría garantir as mesmas oportunidades para todo o alumnado, independentemente do territorio.
O conselleiro acusou ao Executivo de Pedro Sánchez de equivocarse ao rexeitar unha proposta consensuada entre comunidades gobernadas polo PP e a Conferencia de Reitores das Universidades Españolas (CRUE), que busca un sistema común e equitativo. Para Rodríguez, o importante non é tanto o tipo de proba –competencial ou memorística–, senón que haxa igualdade de oportunidades en todo o Estado.
As declaracións producíronse antes dun acto de recoñecemento aos 949 estudantes galegos que obtiveron as mellores cualificacións na PAU, procedentes de 214 centros. No evento, celebrado en Vigo e co respaldo dos reitores das tres universidades galegas e do alcalde, Abel Caballero, o conselleiro felicitou os galardoados polos seus resultados e animounos a manter o esforzo e a dedicación na etapa universitaria que iniciarán en setembro.
