O BNG de Vigo esixiu ao alcalde, Abel Caballero, que reclame ao Ministerio de Transportes e Mobilidade Sustentable o mantemento das bonificacións e viaxes gratuítas nos servizos ferroviarios de media distancia, así como os descontos no transporte urbano por autobús. Nun comunicado, os nacionalistas reivindicaron que manter os abonos gratuítos de tren é unha “necesidade básica e esencial” para os vigueses para garantir un transporte público “accesible”.

“Non é aceptable que se eliminen estas bonificacións sen ofrecer alternativas que aseguren unha mobilidade xusta e sustentable”, remarcou o portavoz local do Bloque, Xabier Pérez Igrexas. “Nun momento no que se están destinando miles de millóns de euros a máis gasto militar e armamentístico, non podemos aceptar que se retiren as bonificacións ao transporte. Menos tanques para alimentar a industria da guerra e máis buses e trens para todos“, engadiu. Todo iso despois de coñecerse este venres que Renfe lanzará o luns os novos abonos mensuais de proximidade e descontos en Media Distancia, eliminando os abonos gratuítos.