A Xunta de Goberno Local de Vigo, nunha sesión extraordinaria e urxente celebrada este martes, aprobou a participación do Concello olívico na terceira convocatoria de axudas do PERTE para a mellora da eficiencia do ciclo urbano da auga.

Así o confirmou o alcalde, Abel Caballero, en declaracións remitidas aos medios, nas que explicou que Vigo concorre cun proxecto de 7,3 millóns de euros, e pide unha axuda de 6 millóns (o resto do custo será asumido pola concesionaria do servizo de abastecemento, Aqualia).

Segundo explicou, a iniciativa supón a creación dun centro intelixente de xestión do ciclo da auga, para monitorar e vixiar todo o servizo en tempo real. “Imos obter os datos de posibles problemas, e saberémolo ao instante”, apuntou.

Esta dixitalización e monitorización afectará a todo o ciclo, empezando pola captación e pasando pola potabilización, distribución, rede de rede de sumidoiros e depuración.

O Concello olívico xa optou ás dúas anteriores convocatorias do PERTE, pero o proxecto presentado quedou fóra das axudas.