Stellantis superou o millón de unidades producidas do Peugeot 2008 na súa factoría de Vigo, despois de que o grupo automobilístico comezase a ensamblaxe deste modelo en 2019.

En concreto, é o Sistema 1 da planta olívica o que monta este vehículo sobre a plataforma modular multi-enerxía CMP, o que lle permite ensamblar modelos 100% eléctricos, híbridos ou de gasolina.

A unidade un millón do Peugeot 2008 pertence ao acabado GT, o tope de gama do automóbil, de cor Branca Okemite e equipada coa motorización híbrida de 136 cabalos. O seu destino é Pamplona.

O 2008 converteuse no quinto modelo producido na factoría en superar a cifra do millón de unidades, a cal alcanzaron tamén os Citroën C15, Berlingo e Xsara Picasso e o Peugeot Partner.

A primeira xeración deste todocamino comezou a fabricarse en Vigo en 2019 e en 2020 viu a luz a versión 100% eléctrica. Desta primeira xeración chegaron a construírse máis de 700.000 unidades. A versión renovada do modelo lanzouse a mediados de 2023.

Actualmente, a factoría viguesa produce 900 unidades diarias deste modelo, que se comercializa en máis de 50 países de todo o mundo, sendo Italia, Gran Bretaña, Francia, Turquía, España, Bélxica, Portugal e Alemaña os principais mercados.

Ademais de en Vigo, o Peugeot 2008 fabrícase actualmente en Pombal (Arxentina), Wuhan (China), Karachi (Paquistán), Chu Lai (Vietnam) e Guran (Malaisia).

Nos seus 66 anos de historia, a factoría viguesa superou os 16 millóns de vehículos ensamblados.

“A produción do Peugeot 2008 contribuíu á transformación da planta de Vigo, incorporando innovacións notables nos diferentes talleres. Quero destacar a implicación e o compromiso de todos os traballadores no cumprimento das altas esixencias de produción e calidade deste vehículo”, subliñou o director de Stellantis Vigo, José Luís Alonso, a través dun comunicado.