O Concello de Vigo activará este sábado o seu plan especial de tráfico e mobilidade con motivo da campaña do Nadal, coincidindo co aceso da iluminación do Nadal, segundo confirmou este luns o alcalde, Abel Caballero, en declaracións remitidas aos medios.

Así, o alcalde sinalou que, este ano, como novidade, os residentes nas rúas do centro, consideradas ‘zona cero’ da actividade e dos decorados do Nadal, disporán dun cartón de autorización para poder acceder aos seus domicilios e garaxes, un cartón que, repetiu, deberán levar “visible no cadro de mandos” dos seus vehículos.

As restricións de tráfico afectarán principalmente as rúas céntricas, e aplicaranse os fins de semanas, festivos e vésperas, e días en que se espera gran afluencia de visitantes, de 17,00 a 23,30 horas. Nesas rúas céntricas a velocidade máxima permitida de circulación será de 10 quilómetros por hora, e priorizarase o transporte público.

Así mesmo, os autobuses de pasaxeiros con turistas e visitantes que cheguen á cidade, poderán desembarcar e embarcar viaxeiros nunha zona habilitada na rúa Areal, pero non poderán quedar alí estacionados, senón que deberán dirixirse a outras áreas de aparcadoiro, como a que se habilite en Samil.

A recomendación municipal é estacionar os vehículos particulares lonxe do centro e, na medida do posible, acceder á ‘zona cero’ ou ben a pé ou ben en transporte público. Con todo, explicou o alcalde, as medidas, restricións e modificacións na circulación están dispoñibles na web municipal, www.vigo.org.

Por outra banda, Caballero explicou que, durante toda a campaña do Nadal, haberá postos de Emerxencias e Atención Cidadá na Porta do Sol, entre as 17,30 e as 22,00 horas, e dúas ambulancias na rúa Reconquista e Paseo de Alfonso nos días de máis afluencia de xente, ademais do “servizo itinerante” de Protección Civil.