O xulgado do Contencionso Administrativo 2 de Vigo desestimou un recurso interposto por un veciño da cidade, que denunciaba a inactividade do Concello ante a contaminación acústica xerada pola campaña do Nadal do ano 2022-2023.

Na sentenza, o xuíz expón que o recorrente errou ao acudir a esta canle procesual porque presentou unha reclamación no Concello o 19 de decembro de 2022 e a campaña do Nadal finalizou o 16 de xaneiro de 2023, polo que non se esgotaron o tres meses que, por normativa, a administración ten para responder as reclamacións.

Igualmente, o maxistrado considera que o recorrente non está lexitimado para actuar en defensa do interese xeral de todos os veciños, e apunta que, no seu recurso, non presenta probas concretas sobre os prexuízos específicos que el sufriu. Ademais, lembra a sentenza, non consta que presentase denuncias ante a Policía Local nin que reclamase medicións sonométricas para comprobar se os niveis de ruído axustábanse á normativa.

Por outra banda, o titular do Contencioso Administrativo 2 de Vigo sinala que non se pode falar de inactividade por parte do Concello xa que nos propios pregos das actividades contémplanse as limitacións de volume das atraccións e as limitacións horarias no sistema de megafonía.

O xuíz engade que, ademais, o propio Concello encargou un estudo a unha empresa especializada, que proba que os niveis de ruído non eran desmedidos e, no caso concreto da contorna da vivenda do recorrente (a máis de 350 metros da zona onde estaba a nora, o mercadillo e outras atraccións), o ruído era especialmente baixo ou apenas perceptible.

VALORACIÓN DE ABEL CABALLERO

O alcalde de Vigo, Abel Caballero, expresou a súa satisfacción por esta sentenza “absolutamente favorable ao Concello e ao Nadal”, e proclamou que “esta é a segunda sentenza contenciosa favorable ao Concello” con respecto aos ruídos da campaña do Nadal, antes de engadir que hai “unha sentenza do TSXG que di que o Nadal pode seguir e debe seguir”.

En efecto, o xulgado do Contencioso Administrativo 1 de Vigo desestimou un recurso similar, nese caso interposto por unha veciña da zona de Areal (epicentro das actividades do Nadal), por considerar que o Concello tomara medidas fronte ao ruído e ao non ver probada unha exposición continuada no tempo a esa contaminación acústica.

Tanto a Fiscalía como a veciña presentaron recurso ante o TSXG e o alto tribunal galego, nunha sentenza de xuño pasado (á que fixo referencia o alcalde este xoves), condena ao Concello por vulneración de dereitos fundamentais.

Na devandita resolución, revogou a sentenza do xulgado vigués e determinou que o ruído padecido pola apelante “tivo carácter persistente”, condenando ao Concello a indemnizala en 600 euros e a tomar medidas para “evitar a reiteración da súa conduta lesiva“.

O goberno municipal interpretou esa sentenza do TSXG como unha derrota de PP e BNG porque o alto tribunal “non cuestiona” as celebracións, mentres que os grupos da oposición pretendían “parar e apagar o Nadal de Vigo”.