As organizacións ecoloxistas Greenpeace, Ecoloxistas en Acción, Amigos da Terra, Verdegaia e de dereitos humanos Amnistía Internacional denunciaron a “inacción climática” do goberno local de Vigo e pediron ao alcalde, Abel Caballero, un plan municipal contra o cambio climático.

Nunha carta que enviaron este mércores ao rexedor, no marco do Día Mundial do Medio Ambiente que se celebra cada 5 de xuño, devanditos grupos solicitaron a Caballero que abra unha canle de diálogo permanente para buscar vías de entendemento e colaboración co obxectivo de crear unha asemblea cidadá polo clima en Vigo.

A idea é elaborar un plan plurianual de acción municipal sobre a crise climática, con retos específicos anuais e mecanismos de revisión e cumprimento, aliñado coas recomendacións científicas para limitar o quecemento global por baixo de 1,5 graos centígrados, entre outras cuestións.

Así, os ecoloxistas quedaron a disposición do alcalde para levar a cabo o encontro e tratar as súas propostas máis concretas. Ademais, este mércores despregaron unha pancarta na fortaleza do Castro para denunciar a “inacción climática” do goberno municipal.