A asociación de veciños Zona Centro de Vigo, a asociación Amigas das Árbores, Ecoloxistas en Acción, Amigas da Terra e a Federación Veciñal de Vigo denunciaron este xoves a “violencia arboricida” do goberno municipal encabezado por Abel Caballero, ao que acusan de destruír a masa vexetal da cidade, e de substituír as árbores de gran porte por “arbolillos ornamentais” e “arbustos”.
Os representantes destas entidades compareceron ante os medios para alertar de que a administración está conculcando o dereito dos cidadáns a poder dispor e gozar de zonas verdes, estendendo cada vez máis os espazos “hostís” e un urbanismo “deshumanizado”.
Por iso, desde a asociación Zona Centro de Vigo, Teresa González trasladou varias propostas e reclamacións ao Concello. Así, pediu en primeiro lugar que se fale de “masa verde” e non de número xenérico de árbores cando se fala das plantacións que leva a cabo a administración, porque “manipula” a información e fai ver que creceu a masa vexetal cando ocorre o contrario.
Tamén esixiu que se faga mantemento e coidado adecuado das árbores, ante a situación de “abandono” que se produciu nos últimos anos, e que desembocou en tallas e eliminación de exemplares baixo o pretexto de que están enfermos ou supoñen un perigo para a seguridade.
Por último, esixiu a Concello e concesionaria de Parques e Xardíns que cumpran a ordenanza municipal de zonas verdes, xustificando con informes técnicos as tallas, e garantindo o dereito cidadán a gozar de zonas verdes públicas.
ENTIDADES ECOLOXISTAS
O portavoz de Amigas da Terra, Antón Lois, denunciou a “eliminación sistemática” de árbores en Vigo e o “especial ensañamiento” cos exemplares de gran porte, con agresións e “podas radicais”, de maneira que “se fai o posible para que as árbores enfermen” e logo acometer tallas. Segundo lamentou, o goberno de Vigo “vai xusto en sentido contrario, ao revés, de todas as recomendacións estatais e europeas”.
Na mesma liña, Xaquín Pastoriza, de Ecoloxistas en Acción, subliñou que levan anos denunciando “tallas sistemáticas” na cidade. Pastoriza centrou a súa intervención en dous espazos concretos, o parque do Castro e a Alameda, onde o goberno municipal, explicou, prioriza a “iluminación” e a “escenografía”, mesmo “vandalizando” o espazo cun mercadillo do Nadal (no caso da Alameda de Praza de Compostela), antes que a protección da biodiversidade. “Priorízanse os elementos estéticos do que o alcalde considera unha cidade fermosa”, explicou.
Igualmente, a plataforma Amigas das Árbores de Vigo e a Federación Veciñal Eduardo Chao criticaron a actuación do goberno local, adoptando decisións “sen a participación activa da cidadanía”, e esquecéndose do mantemento da masa arbórea ata que o seu estado obriga á talla.
