O Concello de Vigo restrinxiu por seguridade o acceso aos parques e espazos arbóreos da cidade desde este mércores e ata o venres, día 29 de marzo, debido ao temporal.

Nun comunicado, o goberno local anunciou que, tras a activación do nivel de alerta laranxa na costa por mal tempo, decidiu pechar os parques da urbe.

“Dada a situación de alerta, procedeuse ao balizamento das entradas á Praza de Compostela, á Riouxa, aos parques de Castrelos e do Castro, á Carballeira da Guía, aos aparcadoiros dos piñeirais da contorna de Samil, ao Lagares e á Bouza”, indicou o Concello.

Así, recomendou aos cidadáns que limiten, na medida do posible, os seus desprazamentos ao aire libre e que tomen as máximas precaucións se acoden a zonas con árbores que poidan verse afectadas pola climatoloxía adversa.