O alcalde de Vigo, Abel Caballero, arremeteu este venres contra o presidente da Xunta, Alfonso Rueda, polas súas palabras das últimas horas, alegando non ter coñecemento detallado das obras de reforma do estadio de Balaídos, e preguntou: “Non ve as obras cando vén ao fútbol?”.

Nunhas declaracións gravadas e remitidas aos medios, o alcalde da cidade olívica referiuse ás manifestacións do presidente galego, sobre o investimento de 5 millóns de euros no estadio da Malata (Ferrol) e o motivo polo que a Xunta non participa no financiamento da reforma do estadio vigués.

Segundo Abel Caballero, Alfonso Rueda mostra unha vez máis a súa “animadversión” cara a Vigo, cando “di que non sabe de que lle falan” en relación ás obras de Balaídos. “É antiVigo, antiVigo, antiVigo, e mente”, proclamou o rexedor.

Respecto diso, lembrou que el mesmo pediu por carta a Feijóo a participación da Xunta no financiamento da reforma, e que reiterou esa petición cando Rueda accedeu á presidencia da Xunta, unha reclamación que repetiu en numerosas ocasións, sen obter resposta do goberno autonómico.

“Como que non sabe nada? Cando vén ao fútbol, que senta alí sen pagar un duro, non ve as obras?”, cuestionou Caballero, que concluíu que Alfonso Rueda está “de novo contra Vigo, contra o Celta e contra Balaídos, que é a principal icona deportiva de Galicia”.

En calquera caso, o alcalde matizou que lle parece “moi ben” que a Xunta invista no estadio ferrolán, aínda que censurou duramente que achegue “cero” á reforma de Balaídos.