O pleno de Vigo aprobou este mércores de forma de definitiva os orzamentos para o ano 2024, que son os máis altos da historia da cidade ao contar con máis de 316,6 millóns de euros. As contas, que saíron adiante cos votos a favor dos concelleiros socialistas, pese ao ‘non’ do PP e do BNG, son “boas para a cidade”, tal como defendeu o edil de Facenda, Jaime Aneiros, quen reivindicou que se fan con “débeda cero” e con “baixa presión fiscal”.
Aneiros xustificou que non se aceptase ningunha das máis de 100 emendas presentadas pola oposición, indicando que algunhas eran “irrealizables”, outras xa estaban incluídas nos orzamentos e algunhas suporían “volver ás políticas do pasado”. O concelleiro de Facenda asegurou que estas contas son boas para todos os barrios e parroquias da urbe olívica, xa que os socialistas “invisten en toda a cidade”.
Na mesma liña falou o portavoz do grupo socialista e do goberno local, Carlos López Font, quen puxo en valor que sexa a 17ª vez que Vigo aproba os seus orzamentos de forma consecutiva, grazas á maioría absoluta do PSOE. El acusou á oposición de defender as súas siglas e non os intereses da cidade, a pesar de que estas contas mellorarán, ao seu xuízo, as políticas sociais e foron realizados de forma “participativa” polo “contacto diario” cos habitantes.
CRÍTICAS DA OPOSICIÓN
Estas palabras distan das ditas pola oposición. En concreto, o portavoz do BNG, Xabier Pérez Iglesias, indicou que o goberno local confunde Vigo “co seu embigo”, negándose a aceptar acordos. “A democracia é moito máis que votar cada catro anos”, lamentou. Iglesias destacou a importancia de aumentar o gasto social do Concello e o investimento en barrios e parroquias e non só en grandes obras como a do ascensor Halo.
Tamén criticou a “privatización” de servizos públicos que supoñen estas contas, indicando que “dúas de cada tres euros” dos vigueses van parar a grandes empresas.
Desde o PP, Marta Fernández-Tapias tamén lamentou estes orzamentos “inflados e pouco fiables”, cunha cifra “estratosférica” que “nunca se chega a executar”. “Chega setembro e déixanse de gastar sete de cada dez euros pola incapacidade política”, engadiu. Para ela, as contas municipais “non teñen en conta a realidade actual”, insistindo na necesidade de reducir a presión fiscal aos vigueses xa que “non é momento de aumentar impostos”.
Tapias puxo o foco nos “investimentos pendentes” que ano a ano recóllense nos orzamentos e seguen sen executarse, con “clásicos” como a humanización da Avenida de Madrid ou as pistas de atletismo de Balaídos. “Son unhas contas do continuísmo do pasado. Non teñen en conta o futuro da cidade”, sentenciou.
