O goberno municipal de Vigo saíu este xoves ao paso das declaracións realizadas nas últimas horas polo comité de empresa de Vitrasa (concesionaria do bus urbano), nas que pedían a dimisión do alcalde por non ser capaz de solucionar o conflito neste servizo, e sinalou que esa petición é a “proba concluínte” de que a folga indefinida é “política”.

Así o trasladou, nunhas declaracións gravadas e enviadas aos medios, o portavoz do goberno vigués, o edil socialista Carlos López Font. “Pedir a dimisión do alcalde é a proba concluínte de que actuán nunha estratexia política dirixidos polo BNG e pola CIG”, proclamou.

López Font acusou ao comité de Vitrasa de actuar “sen preocuparse polos seus traballadores nin polos vigueses que necesitan o transporte público na súa vida diaria” e aos que están “a danar gravemente”. O portavoz do goberno local, reiterando os mesmos argumentos que o Concello sostén desde hai semanas e que tamén esgrime a propia empresa concesionaria, incidiu en que os folguistas “só pretenden rebentar a cidade, e sobre todo o Nadal de Vigo”. “Pero é evidente que non o conseguen”, rematou.