A Policía Local de Vigo detivo a un home de 56 anos de idade, O.A.V., como presunto autor dun delito de violencia de xénero, por unha agresión á súa parella, coa que discutiu por supostos motivos económicos.

Segundo informaron fontes policiais, os feitos ocorreron a pasada madrugada, cando o 092 recibiu un aviso dunha muller para acudir a un domicilio da rúa Mazaricos, ante un epispdio de violencia de xénero.

Á súa chegada, os axentes entrevistáronse coa muller, que relatou que tivera unha discusión coa súa parella, porque el lle recriminou un gasto que aparecía reflectido nunha conta común. Segundo a súa versión, o home reaccionara de forma violenta, impedíndolle saír de casa para ir traballar e quitoulle 10 euros da carteira.

No transcurso da rifa, ademais, agarrouna polo pescozo, abaneándoa e empuxándoa, chegando a golpeala contra a parede e darlle unha forte puñada no peito.

Cando o home se deu conta de que a muller estaba a chamar á Policía, fuxiu do lugar. Coa descrición facilitada pola requirente, os axentes lograron atopar ao sospeitoso na rúa Águia, e ao preguntarlle polo sucedido, o home admitiu a discusión pero negou agredir á súa parella. Con todo, foi detido como presunto autor dun delito de violencia de xénero.