O xulgado de Instrución 1 de Vigo acordou o sobresemento provisional e arquivo da causa aberta sobre un incendio rexistrado na rúa Alfonso X da cidade, o pasado 11 de outubro, e no que morreron unha nai e tres dos seus fillos, ao descartarse que fose intencionado.

Segundo informaron fontes xudiciais, tras a práctica das dilixencias oportunas, “non resultou debidamente xustificada a perpetración do delito que motivou a apertura da causa” e non hai indicios de que se cometeu unha “infracción penal”.

No seu auto, a maxistrada sinala que é “especialmente relevante e significativo” o informe técnico policial sobre as causas do incendio, que indica que o lume tivo un único foco inicial, no portal, onde se situaba o cadro elétrico do inmoble. Alí, constatouse que había dous tramos distintos de cable de fíos de cobre con empalmes e rixidez derivada de fusión e soldadura por calor interna, é dicir, “por sobreintensidade”.

Os aveños acumulados no portal aumentaron as chamas, a calor e o fume, que ascenderon polo oco da escaleira ata as plantas superiores. Nese incendio faleceron unha muller e tres dos seus fillos, e máis dunha ducia de persoas resultaron feridas, entre elas a parella da vítima adulta e unha cuarta filla de ambos.