O incendio dun edificio en Vigo, no que morreron unha nai e tres dos seus fillos menores, na madrugada deste mércores, mobilizou a todos os bombeiros dispoñibles nese momento na cidade, un total de 17, cifra que está por baixo do mínimo necesario decretado polo propio Concello.

Así o denunciaron fontes sindicais, que lembraron que o propio goberno municipal estableceu por decreto que o número mínimo de bombeiros que ten que haber para garantir a seguridade na cidade é de 20 (máis un xefe de servizo, que non fai tarefas operativas).

Na quenda de noite deste mércores, o número total de bombeiros dispoñibles era de 17 (deles, un facía funcións de telefonista), por baixo do mínimo “unha vez máis”, e todos foron mobilizados para actuar no lume do inmoble de Alfonso X o Sabio.

Os sindicatos advertiron de que, nese momento, o número de efectivos que quedaban nos parques para outra eventual actuación era de “cero”. “Houbo sorte, porque o parque de Coruxo non estaba pechado, que é algo que pasou reiteradamente por falta de efectivos, e porque non houbo outra actuación simultánea”, indicaron as fontes consultadas.

As mesmas fontes lembraron que, fai tres semanas, cando se produciu un incendio no punto limpo da cidade, os bombeiros dispoñibles eran 12 e que, por primeira na historia, o servizo de extinción de Vigo tivo que contar con reforzos de parques de fóra da cidade (Mos e Val Miñor).

Así, volveron a denunciar que a falta de persoal no servizo é un “problema crónico” desde hai anos e que as ofertas públicas de emprego están paralizadas e non se toman medidas para incrementar o persoal. Respecto diso, alertaron de que “é cuestión de tempo” que a falta de persoal volva quedar en evidencia noutra situación de emerxencia.

Os sindicatos levan anos denunciando a falta de persoal neste servizo e, de feito, convocaron en 2019 unha folga indefinida que se prolongou durante máis dun ano e medio, para denunciar ese déficit no persoal e para mostrar o seu rexeitamento a un decreto municipal que suspendía os descansos dos bombeiros e impúñalles a realización de horas extras.

Os xulgados declararon nulo ese decreto e tamén invalidaron o decreto de servizos mínimos aprobado polo goberno municipal con motivo da folga, xa que obrigaba a traballar ao mesmo número de efectivos que habitualmente estaban dispoñibles.

Desde entón, aínda que se incorporaron novos efectivos, seguen sendo insuficientes segundo os sindicatos, xa que se seguen producindo xubilacións e quedan ofertas de emprego público sen executar.

RESPOSTA DA CONCELLEIRA DE SEGURIDADE

Preguntada polo número de bombeiros nos parques municipais, a concelleira de Seguridade, Patricia Rodríguez Calviño, afirmou que se “confunde” o número de efectivos que hai dentro dos parques, con “o número de efectivos necesarios para unha intervención de bombeiros”.

Segundo indicou, “o número necesario para a intervención” foron os efectivos que participaron no dispositivo e engadiu que, de feito, non fixo falta a intervención dos bombeiros mobilizados desde o parque de Coruxo nin da motobomba.

Ante a insistencia, sobre o número total de bombeiros dispoñibles, Rodríguez Calviño apuntou que non dispuña desa cifra, e que só tiña coñecemento dos efectivos que participaran no operativo.

Por último, o Concello de Vigo quixo aclarar algúns aspectos sobre o operativo desprazado ao edificio incendiado. “Non é certo que fosen mobilizados todos os efectivos, xa que dous permaneceron nos parques de Teis e Coruxo, un en cada parque”, aseveran. Desprazáronse os dous trens de primeira saída de ambos os parques, conformados por un total de 12 persoas, aos que se sumaron o camión escaleira de Teis, con dous efectivos e 3 efectivos máis (17 persoas). O número de efectivos totais desta intervención foi de 19 profesionais.

“En ningún momento os parques quedaron desatendidos. En calquera caso, o número de bombeiros mostrouse suficiente e eficaz”, insisten. De forma simultánea á extinción, foron rescatadas en altura dúas persoas sobreviventes e, unha vez o lume estaba extinguido, unha operación que se desenvolveu en tres minutos, procedeuse á evacuación interior do inmoble, percorrendo planta por planta. Así mesmo, a administración local fíxose cargo dos sete animais de compañía que se atopaban no interior do edificio no momento do incendio. Todos eles foron derivados nun primeiro momento ao servizo veterinario e, posteriormente, á protectora municipal.