O BNG de Vigo demandou ao goberno local un plan de mobilidade e seguridade para evitar que se repita o “caos insoportable e inseguro” de tráfico do Nadal pasado.

Nun comunicado, o portavoz nacionalista, Xabier Pérez Igrexas, pediu medidas que eviten as retencións e que garantan o paso “áxil” dos vehículos de emerxencia. Tamén propuxo a instalación de aparcadoiros disuasorios e lanzadeiras de autobús, para que os visitantes non accedan ao centro en coche.

“Estamos a 9 de outubro e por iso cremos que non pode haber escusas. O goberno de Abel Caballero ten que deseñar un operativo municipal que evite que o seu Nadal converta un ano máis á cidade nun parque temático inseguro e inhabitable”, reivindicou Igrexas.

Para el, é “fundamental” que se adopten medidas concretas para evitar as aglomeracións, sobre todo o fin de semana, que se converten “nun calvario”, e para que non se volvan a producir “situacións gravísimas como ver decenas de vehículos aparcando en túneles”.