O sindicato CUT rexeitou o adianto da negociación do convenio colectivo de Stellantis Vigo, que será o 31 de outubro, e sospeita que o anticipo estea derivado da próxima publicación da concesión de axudas do plan PERTE, para o vehículo eléctrico e conectado.

Segundo informou o sindicato nun comunicado, este sábado celebraron unha asemblea aberta a todas as persoas traballadoras da planta.

Esta convocatoria foi pola apertura de negociación do vixente convenio colectivo, que finaliza o 31 de decembro deste ano. Así, o proceso empezará o próximo 31 de outubro ás 10,45 horas e será no Hotel Coia de Vigo segundo estableceu a empresa nun documento “que foi subscrito” polos sindicados SIT, UGT e CC.OO, fóra da CUT.

Desta forma, o sindicato quere “dar voz” aos traballadores da planta para que poidan presentar “unha plataforma consensuada e realista” cara á negociación.

A continuación, incidiu na súa sospeita de por que o adianto da negociación e sinalou que, de producirse a publicación desas axudas antes do proceso, a empresa quedaría “sen baza de chantaxe” para “tentar reducir” as condicións laborais, económicas e sociais en aras da competitividade e da asignación dun novo plan industrial.

O sindicato entende que vai ser “unha negociación dura” porque a empresa “seguramente vai solicitar” máis flexibilidade e contención de custos económicos e sociais.