O alcalde de Vigo, Abel Caballero, trasladou este venres o seu “apoio total” á proposta de ampliación do Instituto Feiral da cidade (Ifevi) realizada por Conxemar, e instou á Xunta a “que se poña ao choio inmediatamente” para acometer esa ampliación, que é “imprescindible”.
Nunhas declaracións remitidas aos medios, o rexedor olívico sinalou que a propia Conxemar expón a ampliación do recinto como “centra para a súa supervivencia”, e insistiu en que a asociación ten “todo o apoio do Concello”, que asumirá “o que lle corresponda”, aínda que matizou que “o Ifevi depende na súa totalidade da Xunta”.
Tras lembrar a importancia da feira de Conxemar, que converte Vigo “nunha especie de ONU” e pon en valor unha industria estratéxica, Abel Caballero denunciou que o grupo municipal do PP votou no último pleno en contra dunha moción do goberno local para pedir a ampliación do Ifevi e a mellora dos accesos.
“Teñen que responder pola súa confrontación coa cidade, e insto á Xunta a que se poña ao choio inmediatamente, porque é imprescinble ampliar o Ifevi”, sentenciou.
