Axentes da Policía Local de Vigo detiveron a un home de 32 anos de idade, J.D.V., por un suposto delito de lesións, tras dar unha puñada a un motorista, que perdeu unha peza dental polo golpe.
Segundo informaron fontes policiais, os feitos ocorreron na noite do mércores, cando unha testemuña chamou ao 092 para informar dunha pelexa entre dous homes na Travesía Espiñeiro, no barrio de Teis, por motivos de tráfico.
Ao chegar, os axentes topáronse cun home que sangraba abundantemente pola boca, e que lles explicou que ía circulando en moto e que o condutor dun coche fixera unha manobra brusca para evitar a un peón e case o tira da moto.
Segundo o seu relato, cando se achegou ao coche para recriminar o ocorrido, o condutor propinoulle unha puñada na boca, desprendéndolle unha peza dental.
Pola súa banda, o condutor explicou que, ao tentar esquivar ao peón, invadira o carril contrario e que o motorista “se puxo nervioso”. Segundo afirmou, o motorista baixouse do seu vehículo e dirixiuse ao coche, dando cabezazos ao cristal, polo que o condutor e a súa parella apeáronse.
O condutor asegurou que o motorista se dirixiu á súa muller e empuxouna e deulle unha puñada, polo que, para defendela, el golpeouno na cara. Debido ás lesións producidas, o condutor foi detido, mentres que o motorista foi trasladado ao hospital Povisa para ser atendido das lesións.
ROUBO CON FORZA
Por outra banda, a Policía Local tamén detivo o mércores a un home de 38 anos de idade, J.C.E., ao que sorprendeu revolvendo no interior dun coche estacionado. Foi unha testemuña o que alertou ao 092 de que un individuo estaba na rúa Baixada ao Castaño tentando abrir as portas dos coches aparcados.
Ao chegar os axentes atopárono no interior dun vehículo que tiña o portelo dianteiro dereita fracturada. O sospeitoso afirmou que se atopou o coche aberto e que entrara, alegando que “non é delito” estar sentado dentro dun vehículo.
A Policía contactou co dono do turismo, que explicou que o deixou correctamente aparcado e pechado, polo que se procedeu á detención do sospeitoso, que ademais tiña cortes sanguentos nos nudillo, por un suposto delito de roubo con forza.
