A Policía Local de Vigo detivo este pasado mércores un home, I.R.A. de 66 anos de idade, por agarrar do pescozo e abanear á súa esposa, que tivo que ser trasladada ao hospital ante o estado de ansiedade e nerviosismo que presentaba.

Tal como informou o corpo de seguridade, os feitos ocorreron sobre as 18,10 horas, cando os axentes tiveron constancia de que a muller solicitara presenza policial no seu domicilio debido a ser agredida durante unha forte discusión coa súa parella.

En concreto, a vivenda estaba na avenida Gregorio Espino e unha vez no lugar os funcionarios entrevistáronse coa vítima, que explicou que o seu esposo a agarrou en varias ocasións do pescozo e que a abaneou, polo que presentaba marcas na zona.

Despois, os axentes falaron co agora detido, que admitiu as acusacións vertidas pola muller, tendo que ser trasladada ao Hospital Álvaro Cunqueiro ante o estado de ansiedade e as lesións que presentaba.