O delegado do Goberno en Galicia, Pedro Branco, presidiu este luns unha mesa de coordinación enfocada ao cume informal de ministros de Pesca da UE, que se celebrará en Vigo os días 17 e 18 de xullo.
Na reunión participaron a subdelegada do Goberno na provincia de Pontevedra, Maica Larriba; representantes da Presidencia do Goberno e do Ministerio de Agricultura, Pesca e Alimentación; e responsables dos Corpos e Forzas de Seguridade do Estado.
O encontro informal do Consello Europeo de Pesca é a primeira reunión da Presidencia Española da UE, e terá lugar no Auditorio Mar de Vigo da cidade olívica. A esta cita seguiralle reunión ministerial do ECOFIN (15 e 16 de setembro en Santiago de Compostela); e varias reunións técnicas de expertos sectoriais que se celebrarán en Vigo, Lugo e Santiago de Compostela.
Na reunión da semana que vén en Vigo, na que estarán presentes o comisario europeo de Medio Ambiente, Océanos e Pesca, Virginijus Sinkevicius, e o ministro de Agricultura, Pesca e Alimentación do Goberno de España, Luís Planas, abordarase o proceso de descarbonización do sector pesqueiro.
