A Federación de Libraría de Galicia saíu ao paso das críticas pola celebración da Feira do Libro de Vigo na zona peonil do Calvario, e sinalou que, aínda que as cifras de visitas e vendas foron lixeiramente superiores a outros anos, seguen estando por baixo do que correspondería á maior cidade de Galicia.

A través dun comunicado, a Federación explicou que, a principios de 2023, expuxo as posibles datas e negociou co Concello, como é habitual, a localización das casetas. O Concello, “o que menos achega económica presta á organización da súa feira”, expuxo a posibilidade de facer a feira no barrio do Calvario, no marco da Festa da Alegría.

“A Federación de Librarías de Galicia considerou interesantes as condicións que o Concello sumaba (…), e valorou positivamente enmarcar a feira dentro dun proxecto que contiña máis actividades,e que podería axudar a sumar público ao proxecto (…)”, explicou a organización.

A Federación afirmou que é consciente “da controversia” suscitada por esta nova localización, pero lembrou que a feira cambiou de contorna tres veces na última década en Vigo. “Todas as localizacións tiveron críticas e aplausos, proles e contras”, lembraron, e sinalaron que, para valorar a actual localización, preferiron esperar a que terminase o evento.

Unha vez concluída a feira, constataron que o número de visitantes e as cifras de vendas foron lixeiramente superiores a anos anterioes, “pero seguen sendo máis baixos do desexable para a feira do libro do concello máis grande de Galicia”. “Polo que seguiremos traballando na procura da localización e proposta adecuada, como fixemos sempre”, subliñaron.

Finalmente, desde a Federación fixeron un chamamento “á calma” e pediron que os debates políticos “non aparten o foco mediático do verdadeiramente importante: as xornadas de convivencia entre autores e lectores que esta feira permitiu”.