O alcalde de Vigo, Abel Caballero, celebrou este xoves que o AVE directo a Madrid por Cerdedo xa ten “luz verde definitiva” despois de que a Confederación Hidrográfica Miño Sil remitise ao Ministerio de Transportes o seu informe favorable no marco do estudo hidrogeológico para este trazado.
Nunha rolda de prensa, o rexedor olívico explicou que, a partir de agora, quedan os pasos definitivos de redactar o proxecto construtivo e executar a obra, “despois de tantos anos esperando” e de “tantas cambadelas” por parte do PP.
Así mesmo, afirmou que, “se o Goberno actual continúa, o AVE directo por Cerdedo será unha realidade”. “Non sei que pasará se cambia o Goberno, porque a cabeza de lista do PP por Pontevedra (Ana Pastor), cando era ministra, freouno en seco”, aseverou.
Abel Caballero rememorou todas as vicisitudes polas que pasou o proxecto do AVE directo Vigo-Madrid, e volveu a acusar ao PP de bloquealo, de deixar caducar o estudo de impacto ambiental realizado en tempos de Zapatero e de metelo “nun caixón”.
“Agora ten luz verde total e absoluta (…), xa non hai impedimentos, agora é cuestión de vontade política”, insistiu o rexedor, que lembrou que Vigo “era a única gran cidade de España” que non dispuña de conexión con Madrid por AVE porque “o PP a deixou fóra” e “nunca tivo ningún apoio por parte de Feijóo”.
PXOM
Por outra banda, Caballero referiuse a a tramitación do Plan Xeral de Ordenación Municipal (PXOM) e, do mesmo xeito que xa fixo nas últimas horas a concelleira de Urbanismo, María José Caride, culpou á Xunta de ter o documento “bloqueado” por non achegar os informes da Axencia Galega de Infraestruturas e de Patrimonio Histórico.
Segundo o alcalde, o Concello respondeu a todos os requirimentos que se lle fixeron desde estas dúas instancias, e o último envío de documentación produciuse fai tres meses, sen que ata agora haxa resposta da administración autonómica. “Non hai ningún impedimento técnico (…), están a bloquear a PXOM por razóns políticas e o dano á cidade é elevado”, sentenciou, á vez que lanzou unha advertencia á Xunta: “Contesten xa, porque se non, terán á cidade enfronte”.
