A Federación Nacional de Confrarías ve “inadmisible” que o ‘Ártabro’, o buque que inspeccionará o pecio da ‘Vila de Pitanxo’ e que partiu este mércores do porto de Vigo cara a augas canadenses, partise “sen autorización do xulgado competente”, así como que o xuíz “tampouco fose informado os peritos” que integran a expedición.
Nun comunicado, a Federación censura a partida do buque cando “aínda estaba pendente” que o xuíz “se pronunciase acerca da viabilidade de que se nomease un perito de parte” e, ademais, “descoñece quen son finalmente os peritos que van no barco”.
Así, considera esta forma de actuar “bastante irrespetuosa” coas familias afectadas, xa que “pon en perigo as probas que se poidan achegar á causa para determinar as responsabilidades por este sinistro”.
Nesta liña, esixe unha investigación “seria e rigorosa” sobre as causas do naufraxio da ‘Vila de Pitanxo’. “Cremos que as familias necesitan mostras de apoio por parte das Administracións reais e non meramente retóricas”, conclúe.
Pola súa banda, a portavoz das familias, María José do Pazo, agradeceu “a toda a familiar do mar” o seu “apoio e solidariedade” e trasladou “inmensas grazas” á Federación Nacional de Confrarías.
O Goberno, con todo, desvinculouse da partida do ‘Ártabro’, alegando que a inspección está dirixida pola Comisión Permanente de Investigación de Accidentes e Incidentes Marítimos (CIAIM), que é un órgano independente. Así mesmo, fontes do Executivo apuntaron esta semana que, a bordo do barco van peritos xudiciais, un nomeado pola Audiencia Nacional, un da CIAIM, e un perito da Axencia Europea de Salvamento e Seguridade Marítima como observador.
