Seis membros dun grupo familiar, acusados de traficar con droga no barrio vigués de Teis, eludirán o ingreso en prisión tras chegar a un acordo coa Fiscalía e tras a aplicación de circunstancias atenuantes, tal e como quedou reflectido na sentenza ditada na sección quinta da Audiencia Provincial de Pontevedra, tras un acordo de conformidade.
María Soidade G.M., Jesús M.G., Modesto M.G., Ana G.R., Antonio M.B. e Adela G.J. sentáronse no banco dos acusados como presuntos autores dun delito contra a saúde pública e a Fiscalía pedía inicialmente para eles penas que oscilaban entre os 5 e 3 anos e medio de prisión.
Tras o acordo e o recoñecemento dos feitos por parte dos procesados, o Ministerio Público modificou as súas conclusións e acusou a María Soidade, Jesús, Modesto e Ana dun delito de tráfico de drogas, coa circunstancia atenuante de drogadicción en todos os casos. A Antonio e Adela considéraos cómplices do delito, ao colaborar cos demais acusados na súa actividade de venda de estupefacientes.
Ademais, María Soidade e Jesús deberán pagar unha multa de 1.500 euros cada un; Modesto e Ana deberán pagar multa de 200 euros; e Antonio e Adela deberán pagar unha multa de 500 euros cada un.
As partes tamén acordaron a suspensión da execución da pena, de maneira que ningún dos procesados entrará en prisión. No caso dos autores do delito, a suspensión acordouse por un período de 5 anos, a condición de que non volvan delinquir nese tempo e continúen os seus tratamentos de desintoxicación das drogas; no caso dos cómplices, a suspensión da pena de prisión é por 3 anos, tamén a condición de que non delincan nese período.
FEITOS RECOÑECIDOS
Os procesados admitiron que, entre maio e setembro de 2020, adicábanse á venda de cocaína e heroína desde dous domicilios da zona da Avenida de Galicia e nas inmediacións do Centro de Saúde de Teis.
Nos rexistros dos domicilios, os axentes incautáronse de diversas cantidades de heroína e cocaína, decenas de moedas de prata antigas, básculas, armas brancas, 17 décimos de lotaría de Nadal e uns 2.500 euros fraccionados en distintos billetes.
