O Concello de Vigo, a través da concesionaria Aqualia, iniciará o estudo para a execución dunha obra que garanta o abastecemento de auga á parroquia de Calvos, en Fornelos de Montes, desde a presa de Eiras, que é propiedade municipal viguesa pero está situada nese concello. Así o trasladou o alcalde, Abel Caballero, en declaracións remitidas aos medios, e tras manter un encontro co rexedor de Fornelos, o tamén socialista Emiliano Lage.
Segundo explicou Caballero, nese municipio de pouco máis de 1.600 habitantes, hai un problema de abastecemento nunha das súas parroquias, a de Calvos, que non ten traída de augas, e os pozos que fornecían a auga “están a secarse” debido ao cambio climático. Trátase dunha zona que se atopa á beira do encoro de Eiras, que prové de auga á cidade de Vigo e unha decena de municipios máis da área.
O goberno local de Fornelos expuxo a petición de recibir abastecemento desde a presa, e Caballero prometeu a súa colaboración “para resolver o problema”. “A miña resposta é absolutamente si”, proclamou, á vez que lembrou que Vigo se abastece da presa situada en Fornelos, municipio que sempre tivo un “trato amable” coa cidade.
Por iso, explicou que deu instrución á concesionaria que xestiona o encoro (e o servizo de saneamento e abastecemento en Vigo), Aqualia, para que inicie o estudo de necesidades desa parroquia e as alternativas para garantirlle a auga, “seguramente a través dun bombeo”. “O máis axiña posible farémonos cargo desde Aqualia, desde a presa, desde Vigo, do custo do proceso de abastecemento (…), iniciamos o estudo, haraemos a obra e resolveremos o problema”, sentenciou Abel Caballero.
