O alcalde de Vigo, Abel Caballero, anunciou este martes que o Concello presentará a candidatura das Illas Cíes a “Geoparque Mundial” da Organización das Nacións Unidas para a Cultura, as Ciencias e a Educación (Unesco).
Será o venres 31 de marzo cando o rexedor presente no Auditorio Mar de Vigo esta candidatura, co obxectivo de que en 2024 o arquipélago sexa parte da devandita Rede Mundial de Geoparques. O alcalde olívico xa enviou unha carta á secretaria de Estado de Cooperación Internacional, Pilar Cancela, mostrando a súa vontade a realizar este labor.
“É importantísimo. Un recoñecemento de ámbito mundial. En Galicia temos o geoparque das Montañas do Courel e o proxecto de Cabo Ortegal. As Cíes será o terceiro Geoparque Mundial da Unesco (da Comunidade)”, reivindicou.
Caballero lembrou que o goberno local traballa desde 2014 na candidatura das Illas Cíes a Patrimonio da Humanidade, polo que as investigacións feitas ata agora serven para a nova candidatura, aínda que tamén haberá que completar novos requirimentos, segundo dixo.
