A delegada da Xunta en Vigo, Ana Ortiz, cifrou en 78 millóns de euros os investimentos autonómicos na cidade “bloqueados” polo goberno municipal de Abel Caballero, e puxo como exemplo o centro de asociacionismo, cun investimento previsto de 20 millóns de euros.

Nunha comparecencia ante os medios diante do edificio do antigo xulgado, onde se ía construír esa dotación, Ana Ortiz sinalou que o bloqueo dese proxecto (cuxa obra foi licitada pero non chegou a executarse porque o Concello suspendeu a licenza outorgada) é “o exemplo máis evidente da política de destrución do alcalde”.

Agora, o TSXG deulle a razón á Xunta e concluíu nunha sentenza recente que o Concello non debía ter suspendido a licenza, pero “os danos xa están causados e son irreparables”. De feito, o goberno galego estuda reclamar os custos á administración municipal, xa que tivo que resolver o contrato e indemnizar a empresa adxudicataria das obras.

“Os vigueses teñen dereito a coñecer a verdade e aquí non hai opinións, son feitos. O alcalde bloqueou a recuperación deste edificio nunha actuación lamentable que indica a súa forma de proceder”, denunciou a delegada. Ademais, referiuse a outros investimentos da Xunta que seguen paralizados pola actuación municipal, como o túnel de Elduayen (17,8 millóns), a ETEA (10,5 millóns dos viarios máis 15 millóns da residencia de maiores da Fundación Amancio Ortega) ou as pistas de atletismo de Balaídos (7 millóns), entre outros.