InicioMedio Ambiente e PatrimonioPiden a retirada da simboloxía franquista nas igrexas de Nigrán

Piden a retirada da simboloxía franquista nas igrexas de Nigrán

Lembra o Ateneo que xa en 2014 a Corporación municipal de Nigrán considerou oportuno solicitar á Diócese de Tui-Vigo o cumprimento da Lei de Memoria Histórica

PUBLICADO O

Coincidindo co aniversario do golpe militar do 18 de xullo de 1936, Lucenza- Ateneo de Nigrán ven de enviar unha carta ao Bispo de Tui, Luis Quinteiro Fiuza, reclamándolle compromiso e cooperación para a retirada da simboloxía franquista presente aínda en todas as igrexas parroquiais do municipio.

Trátase de placas e inscricións colocadas nos muros exteriores das igrexas, nas que figura o nome do dirixente falanxista José Antonio Primo de Rivera e mesmo nalgún caso o símbolo fascista do xugo e as frechas, ademais de referencias  aos “caídos na Cruzada de 1936 a 1939” e o “Ano da Vitoria”, o que supón un claro enaltecemento do bando franquista.

Para Lucenza estas simboloxías son elementos contrarios á memoria democrática, proxectados a espazos de uso público e que supoñen un agravio permanente ás vítimas da represión exercida na comarca polos golpistas do 36 e polo réxime da ditadura franquista.

Por iso o Ateneo de Nigrán solicita ao Bispado, como xesto claro de compromiso democrático, que tome a iniciativa da retirada deses símbolos ou solicite canto antes a cooperación das administracións públicas para dito cometido.

Lembra o Ateneo que xa en 2014 a Corporación municipal de Nigrán considerou oportuno solicitar á Diócese de Tui-Vigo o cumprimento da Lei de Memoria Histórica no seu patrimonio de Nigrán, mais nestes oito anos en nada ten cambiado a situación.

Lucenza fai un chamamento ao Concello de Nigrán para que, tamén dende esta institución, se realicen todas as xestións necesarias co Bispado co obxectivo de colaborar e axilizar a retirada efectiva destes símbolos, acordando e esclarecendo todas as cuestións que sexan precisas (elaboración de proxectos de intervención, plan de financiamento dos traballos, obtención das autorizacións e informes de patrimonio pertinentes, etc.).

ÚLTIMAS

Abel Caballero celebrará un pleno extraordinario contra o “veto por ideoloxía” a varias relatoras nun programa da Deputación

O alcalde de Vigo, Abel Caballero, anunciou este venres que a próxima semana convocará un...

A Xunta Electoral arquiva unha denuncia do PP por declaracións de Hereu na súa visita a Redondela e Vigo

A Xunta Electoral de Galicia decretou o arquivo dunha denuncia formulada polo PPdeG en...

O Porto de Vigo pecha xaneiro como líder nacional en movemento de vehículos, con 55.801 unidades

O Porto de Vigo pechou xaneiro deste ano arrebatando o liderado en movemento de vehículos á...

O cadáver da muller achada nunha maleta presenta unha puñalada e aínda non puido ser identificada

A autopsia realizada ao cadáver da muller achada dentro dunha maleta nunha leira abandonada...