Efectivos da Garda Civil de Baiona-Nigrán investigaron a tres menores de Nigrán como presuntos autores dun delito continuado de danos intencionados sobre sete vehículos que se atopaban estacionados nas inmediacións de Praia América, así como nun chiringuito que abre en época estival da mesma localidade.

Segundo informou o Instituto Armado, tivo coñecemento dos danos ocasionados a estes vehículos ao recibir as denuncias dos afectados, por feitos que tiveron lugar a madrugada do 22 do pasado mes de agosto.

Nos sete casos denunciados, “os coches presentaban patadas ou golpes con algún tipo de obxecto contundente nos espellos retrovisores”, indican as mesmas fontes. A Benemérita concretou que os vehículos estaban estacionados nas inmediacións de Praia América e o chiringuito nas pistas de tenis que hai no mesmo areal.

Ao mesmo tempo, a Policía Local de Nigrán, despois de ser requirida polos mesmos feitos, identificou os tres mozos, menores de idade, autores dos danos.

Por iso procedeuse á investigación do tres menores como presuntos autores dun delito continuado de danos, pola rotura de espellos retrovisores de sete vehículos estacionados na zona de Praia América, e os ocasionados polo lanzamento de cadeiras e mesas de terraza contra un chiringuito de praia situado nesta mesma zona.

Deste xeito, instruíronse dilixencias que foron remitidas á Fiscalía de Menores de Pontevedra.