Nacho, a quen na familia lle chaman cariñosamente Naco, foi vítima dunha brutal malleira fai un ano. Entón, unhas seis persoas comezaron a pegarlle na madrugada do 16 de agosto do 2020, despois de saír dun evento no Pazo de Urzáiz. “Pensaron que te mataran e deixáronte tirado no medio da maleza para que morreras se non o fixeras xa”, denuncia a nai da vítima, Lupe Comesaña, nunha mensaxe que difundiu por redes.

A nai de Nacho pide agora axuda para que se faga xustiza para o seu fillo, por iso convovoca unha concentración para o día 16 de agosto ás 21.00 horas na Praza do Concello de Nigrán, cando se cumpre un ano da fatídica agresión.

“Enterráronte en vida, apagáronche a luz que desprendías e cargado de lesións e secuelas que son difíciles de superar”, escríbelle súa nai nas redes. Dende fai un ano, Naco, que ten agora 25 anos, recupérase moi lentamente das lesións físicas e psicolóxicas que cambiaron a súa vida. Xa se someteu a unha operación e pouco a pouco vai recuperando a visión dun dos seus ollos.

“Síntome impoñente de non poder facer máis, de sacarte dese burato sen fondo no que te meteron e no que peleas contigo mesmo por saír del”, confesa a nai. Pero o caso de Samuel Luiz, a quen asasinaron cunha brutal paliza, foi unha luz para a familia para animarse a denunciar públicamente o sucedido e buscar apoio social. Naco leva un ano esperando por xustiza mentres sabe que os seus agresores “gozan da vida sen prexuízos nin remordementos”, como apunta a nai.

Coa concentración organizada, non só queren pedir xustiza para Naco, senón que tamén queren denunciar o acontecido e que casos como o de Naco e Samuel non se repitan.