A Confederación Intersindical Galega (CIG) convocou unha concentración no Mercadona de Nigrán contra os “abusos e ameazas” que, ao seu xuízo, sofre o persoal do devandito supermercado, situado en Porto do Molle.

En concreto, levará a cabo a partir das 12:00 horas deste mércores, día 14 de agosto. Esta protesta pretende dar continuidade á campaña que, baixo a lema ‘Un segredo a voces’, denuncia “abusos laborais, faltas de respecto, insultos e ameazas de responsables da tenda ao conxunto do persoal”.

Nun comunicado, a CIG indicou que levarán a cabo varias mobilizacións en distintos centros de traballo da provincia durante os próximos meses. “Con esta campaña, a sección sindical da CIG en Mercadona na provincia de Pontevedra quere denunciar publicamente as desconsideracións, berros, ofensas, persecucións e illamento laboral que realiza a empresa aos empregados, nomeadamente ás mulleres”, reivindicou o sindicato.

Así, xa en febreiro a CIG trasladou á compañía unha serie de incidencias, pedindo unha reunión co departamento de recursos humanos, pero a empresa “mostrouse contraria a realizar ese encontro cualificando a información entregada pola CIG como insuficiente”. A organización sindical lamentou que desde ese momento Mercadona “non tomou ningunha medida”, xa que “as vexacións, o acoso, as persecucións, os insultos e o mal trato van en aumento mes a mes”.