O cabecilla da organización criminal asentada en Málaga que introduciu 650 quilos de cocaína polo porto de Vigo en abril de 2023 estaba “obsesionado” con facerse co monopolio da importación de droga pola terminal viguesa e “non quería que ninguén se lle adiantase”. Así o declarou o axente policial encuberto, co código ‘Encina’, como testemuña no xuízo que se celebra por estes feitos na sección quinta da Audiencia Provincial de Pontevedra.
Este axente conseguiu gañar a confianza do xefe da organización simulando que tiña relación laboral coa actividade loxística e portuaria. Segundo explicou, encargáronlle que, xunto con persoal da súa confianza, facilitase a descarga en Vigo do contedor coa droga, camuflada entre palés de bananas, e axudase a “rescatala” para a súa posterior carga e traslado nun camión.
O PRESUNTO LÍDER, EN PARADOIRO DESCOÑECIDO
Damián G.U., considerado polos investigadores o líder desta rede, atópase en paradoiro descoñecido. Neste xuízo sentan no banco dos acusados catro dos seus homes: os tres que se desprazaron desde Málaga para recuperar a droga no porto vigués e o condutor do camión que ía transportar a cocaína ata o seu destino. A Fiscalía pide para cada un deles 12 anos de prisión e unha multa de 100 millóns de euros por un delito de tráfico de drogas cometido no seo dunha organización criminal.
