O alcalde de Vigo, Abel Caballero, defendeu a implantación de Zonas de Baixas Emisións (ZBE) na cidade, porque é “de cumprimento obrigado” pola normativa europea, e advertiu de que non cumprir os obxectivos de calidade do aire e mobilidade sustentable podería implicar a perda de 35 millóns de euros de fondos da UE. En declaracións remitidas aos medios, despois de que os grupos da oposición expuxesen as súas emendas á ordenanza de ZBE —o BNG pediu directamente retirar o proxecto—, o alcalde lembrou que outras cidades galegas están a tramitar tamén a posta en marcha desas zonas, e afeou a PP e BNG que non coñecen a ordenanza.

Caballero lembrou que el mesmo obxectou á implantación das ZBE porque “Europa non tiña en conta o criterio de ingresos e renda das familias”. Con todo, matizou que a ordenanza municipal recolle unha vintena de excepcións, de maneira que a situación “vai continuar exactamente igual que ata agora durante un tempo e irase adaptando suavemente”. “E desde logo, non haberá multas, haberá notificacións de que se teñen que cumprir as normas das ZBE”, asegurou. Coas excepcións, explicou o rexedor, haberá vehículos exentos das limitacións e “unha parte importantísima do parque de vehículos” da cidade poderá acceder a esas zonas restrinxidas.