Efectivos do GES do municipio da Guarda rescataron na noite deste pasado luns a un menor que quedou atrapado entre as rochas no dique do porto desta localidade.

Así o informou o 112 Galicia, que indicou que segundo a información recollida, o menor, que se atopaba sobre un dique de formigón de catros metros de altura, foi rescatado “consciente e ileso”. O 112 Galicia tivo coñecemento da situación deste menor a través de axentes da Garda Civil sobre as 21,30 horas da noite deste pasado luns.

Despois de recibir o aviso, por parte do CIAE 112 Galicia solicitouse a intervención de Urxencias Sanitarias de Galicia-061 e dos membros do GES da Guarda. Ao lugar o 061 desprazou unha ambulancia de soporte vital básico e un equipo sanitario da PAC da zona que atendeu ao menor e resolveu a asistencia no punto, confirmaron a Europa Press fontes sanitarias.