O Concello de Mos remitiu nas últimas horas un novo escrito á Subdelegación do Goberno de Pontevedra para reclamar medidas urxentes que melloren a seguridade na estrada nacional N-550, despois de que unha peregrina fose atropelada na tarde deste pasado mércores, sufrindo unha fractura na súa perna dereita.

Nun comunicado, o goberno local informou que foi sobre as 16.30 horas cando a muller, á altura do cruzamento co Camiño da Quiringosta, foi arroiada por un vehículo que se deu á fuga. Tratábase dunha peregrina alemá de 47 anos de idade que foi atendida inicialmente por veciños da zona para, despois, ser trasladada ao hospital Álvaro Cunqueiro.

Tras o accidente, a alcaldesa, Nidia Arévalo, reiterou a necesidade de mellorar a seguridade viaria nesta vía, solicitando ao Goberno medidas como o reforzo da sinalización, actuacións para retardar o tráfico ou a revisión dos límites de velocidade, así como un maior control da circulación, ente outras accións.

Tamén solicitou unha reunión urxente entre a Subdelegación do Goberno, a Demarcación de Estradas do Estado e o Concello para analizar a situación e coordinar medidas.