A Policía Nacional detivo en Vigo aos dous supostos autores dun roubo con forza nunha empresa de enxeñaría situada no barrio de Teis ocorrido a principios deste mes. En concreto, os feitos tiveron lugar na madrugada do día 7 de outubro, momento no que os autores forzaron o acceso ás instalacións da compañía para levar material informático e de telefonía, cartóns de crédito que posteriormente utilizaron e mesmo un vehículo de alta gama. O montante dos efectos subtraídos ascendía a 21.000 euros.

Tal como informa a Policía Nacional, a investigación permitiu pescudar a identidade dos ladróns e a súa implicación no roubo, procedéndose á súa detención. Así mesmo, realizouse un rexistro da vivenda dun deles, situada tamén en Teis, recuperándose a práctica totalidade dos efectos, así como o coche subtraído.