Bombeiros de Vigo concentráronse este domingo ás portas do parque central de Teis en honra ao bombeiro falecido este sábado na cidade olívica ao derrubarse unha parede mentres realizaba con outros compañeiros a revisión do estado dun edificio en malas condicións no que se alertou de que había un derrube na cuberta.

Os seus compañeiros, aos que se sumaron efectivos da Policía Nacional e da Policía Local –corpo do que a vítima formara parte con anterioridade– fixeron soar na súa memoria as sereas do parque e dos camións ás 12.00 horas. Tamén houbo aplausos e varios compañeiros tocaron a gaita en recordo de Sergio S.D., de 49 anos.

O concello de Vigo vive a segunda xornada de loito oficial decretado tras o falecemento deste bombeiro nuns feitos que sucederon sobre as 11,30 horas deste sábado no número 127 da avenida de Beiramar.