Centos de traballadores do comercio do metal da provincia de Pontevedra saíron de novo á rúa este xoves en Vigo ante a “tomadura de pelo” da patronal e esixen un convenio “digno”. Nunha nova xornada de folga, os empregados do sector concentráronse na farola de Urzáiz a partir das 12.00 horas para protestar pola situación que están a vivir, despois de romperese a negociación do novo convenio colectivo o pasado xaneiro, pese a que o vixente documento leva xa ano e medio caducado.

A berros de “Comercio do metal, solución”; “Patronal, escoita, estamos en loita”, ou “Se sobe o IPC tamén teñen que subir os soldos”, os traballadores expresaron o seu rexeitamento ás propostas empresariais. En moitos casos apuntaron directamente á Asociación Autónoma de Empresarios de Talleres de Reparacións de Vehículos de Pontevedra (ATRA), á que responsabilizan da situación.

Segundo Transi Fernández, da CIG, esa organización empresarial pretende eliminar do convenio certos dereitos, coma a cobertura do 100 % desde o primeiro día no caso de baixa por incapacidade temporal. Este foi un dos principais motivos que levaron aos paros. Jorge Carneiro, de Comisiones Obreras, mostrou a súa vontade de “desbloquear” a situación, subliñando que a parte sindical enviou ata dous escritos ás patronais para volver sentarse a negociar, aos que non obtiveron resposta.

Pola súa banda, Roberto Puga, da UGT, lamentou a “mala fe” de ATRA na negociación, ao entender que había un posible acordo sobre a modificación das táboas salariais no convenio, pero esa organización empresarial formulou nas reunións “propostas que non estaban enriba da mesa”, coma non cubrir o 100 % das baixas.

Por todo iso, os tres sindicatos acordaron este xoves convocar outras tres xornadas de folga para o próximo mes de xuño. Con todo, aínda non concretaron os días, á espera de coordinalos con outros conflitos. Ademais, fontes sindicais indicaron que tamén están a planear outras accións para “chamar a atención” e así favorecer que se volva negociar o convenio canto antes.