Axentes da Policía Local de Vigo asistiron nas últimas horas a un home que sufriu unha parada cardiorrespiratoria mentres facía deporte pola Avenida de Beiramar. Segundo informaron fontes policiais, os feitos ocorreron na tarde deste domingo, cando efectivos da Unidade Ambiental de Intervención Rural observaron a un home vestido con roupa deportiva tirado boca arriba na beirarrúa.
Os axentes pararon o seu coche de inmediato para socorrer ao home, que estaba a sufrir unha parada e, utilizando o desfibrilador do seu vehículo, realizáronlle varias descargas e manobras de reanimación, xa que o home apenas tiña respiración e chegou a perder o pulso. Ao mesmo tempo, solicitaron unha ambulancia, que chegou rapidamente e, tras estabilizar ao home, trasladárono ao hospital Álvaro Cunqueiro. A Policía contactou posteriormente coa familia do afectado, que lles informou de que se atopaba ingresado na UCI, estabilizado e sedado.
