FeSMC-UGT Pontevedra denunciou que un acompañante dun paciente atropelou, na tarde do sábado, a unha vixiante de seguridade na zona de urxencias do Hospital Álvaro Cunqueiro de Vigo. Así, segundo se lle transmitiu ao sindicato, o condutor do vehículo “facendo caso omiso ás indicacións do persoal de seguridade para poder deixar a un paciente na zona de urxencias, en actitude chulesca e prepotente, alegando que el aparcaba onde lle saía dos ovos, investiu co seu vehículo á vixiante”.

A persoa de seguridade atopábase na zona de acceso de ambulancias do servizo de urxencias. O golpe do vehículo provocoulle lesións nunha perna, polo cal foi atendida polo persoal do servizo de urxencias e foi necesaria a presenza da Policía, xa que o condutor “negouse a identificarse ante o persoal de seguridade”. A Policía Local levantou un atestado e tramitou a correspondente denuncia na comisaría.

UGT advirte de que “as agresións ao persoal de seguridade están a ser unha constante no seu quefacer diario”. “Por desgraza, a administración co seu deixamento, é cómplice destas situacións sobrevindas que sofren o persoal de seguridade no desempeño das súas funcións”, avisa. Por iso, pide que se proporcione a “debida protección xurídica” aos vixiantes de seguridade, do mesmo xeito que se dá aos profesores ou ao persoal sanitario.