O alcalde de Vigo, Abel Caballero, anunciou que a cidade acenderá as súas luces de Nadal o sábado 19 de novembro, un día antes que en 2021, cando as festas arrincaron na urbe olívica o día 20.
“Iso significa que o Nadal no planeta empeza o 19 de novembro, porque o punto de partida márcao Vigo“, reivindicou o rexedor este luns en rolda de prensa. Entre os cambios previstos para este ano, Vigo atrasará o aceso diario da súa iluminación do Nadal media hora, mentres que adiantará o seu apagado tamén media hora. Desta maneira, as luces estarán acendidas seis horas no canto de sete como no Nadal pasado.
Caballero destacou que isto permitirá ao Concello aforrar un 14,6% do consumo eléctrico, “máis do dobre do que pide Europa”. Así, acenderanse as luces desde as 18,30 horas ata as 00,30 horas.
“Vigo ten o mellor Nadal deste planeta. As máis famosas e mellores luces de Nadal e este ano cun importantísimo aforro enerxético. Máis beleza, máis atracción aforrando un 14,6% do custo enerxético”, subliñou Abel Caballero, quen convidou “a todo o mundo” a acudir á cidade.
