A xunta de persoal da área Sanitaria de Vigo denunciou a “situación límite” que viven os profesionais do servizo de urxencias do hospital Álvaro Cunqueiro polo “aumento inasumible” das cargas de traballo.

Nun comunicado, a presidenta da xunta de persoal, María José Diéguez Beltrán, criticou a “falta de persoal” que se suma ás dificultades derivadas das “deficiencias estruturais” rexistradas desde a entrada en funcionamento do devandito centro hospitalario. Esta situación evidenciouse, segundo Diéguez Beltrán, durante a pandemia, tanto no propio servizo de urxencias como no resto da sanidade pública da área Sanitaria.

“Manifestamos todo o noso apoio a estes profesionais que ven obrigados a empezar mobilizacións e denuncias públicas da situación pola falta de resposta da xerencia ás súas lícitas reivindicacións”, sentenciou.