InicioVigo e contornaRedondelaO acusado de tentar asasinar unha veciña de Redondela négase a declarar:...

O acusado de tentar asasinar unha veciña de Redondela négase a declarar: “Non sei nada”

Os axentes que o detiveron confirmaron que tiña a cara e a roupa manchada de sangue, aínda que el negou a agresión.

PUBLICADO O

O home acusado dunha tentativa de asasinato por golpear na cabeza cunha pedra e unha aixada unha veciña de Redondela negouse a declarar no xuízo contra el, que comezou este mércores na sección quinta da Audiencia Provincial de Pontevedra, con sede en Vigo, e limitouse a manifestar que descoñece os feitos polos que está a ser xulgado: “Non sei nada, non lembro nada diso”.

Ao comezo da vista, o presidente do tribunal preguntou a Manuel N.C., para quen a Fiscalía pide 10 anos de prisión, se coñecía os feitos que se lle atribúen e o home negou saber por que estaba procesado. Entón, o maxistrado leulle os escritos de acusación e, aínda así, o procesado insistiu en que descoñecía a causa.

Os feitos remóntanse a decembro de 2017 cando, segundo a Fiscalía e a acusación particular, Manuel N.C. abordou unha veciña súa con quen estaba a mal e que estaba nunha leira na parroquia de Ventosela. De forma sorpresiva golpeouna na cabeza por detrás cunha aixada. A muller virouse e iniciou un forcexeo co seu atacante, logrando arrebatarlle a ferramenta, pero o home empuxouna e tirouna ao chan, onde a seguiu golpeando na cara e na cabeza cunha pedra.

A vítima, que prestou declaración protexida tras un biombo para non ter contacto visual co acusado, relatou que, ao ser atacada comezou a gritar e a pedir auxilio, á vez que advertía ao seu veciño de que chamaría á Policía. “Díxome que chamase a quen quixese, que de alí non ía saír”, explicou, e asegurou que temeu pola súa vida: “Se non chega a vir un coche, non saio de alí”.

A muller tamén explicou que coñecía ao acusado porque tivera problemas co seu marido, ao que responsabilizaba de queimarlle un alpendre. Así mesmo, aseverou que, despois da agresión, quedou “traumatizada”, sen querer saír de casa por temor a atopalo e con necesidade de tratamento psiquiátrico e psicolóxico que aínda mantén.

Ademais, afirmou ante o tribunal que, tras os feitos, ditouse unha orde de afastamento do acusado, que este incumpriu polo menos en catro ocasiones.

TESTEMUÑAS POLICIAIS

Por outra banda, este mércores tamén compareceron ante a Audiencia varias testemuñas policiais, que interviñeron no lugar dos feitos e na detención do acusado.

Os axentes explicaron que acudiron á zona despois de que un menor escoitase os berros da vítima e alertase aos seus pais, que chamaron á Policía. Unha vez alí, escoitaron o relato da muller, que identificou plenamente ao seu atacante, e localizaron unha gran pedra “de tamaño considerable, máis grande que un lastro”, que tiña restos de sangue e cabelos (a aixada non chegou a aparecer).

Tras alertar aos servizos de emerxencias sanitarias, entrevistáronse tamén con varios veciños que acudiran á zona e que confirmaron que o sospeitoso estaba posto a mal coa vítima, e mesmo deron acenos do seu domicilio, “aínda que insistían en que non querían problemas, porque lle tiñan medo”.

DETENCIÓN

Finalmente, efectivos de Policía Nacional acudiron á vivenda do acusado, ao que atoparon “tan tranquilo” e puideron observar que presentaba rasguños na cara e as mans, “e manchas de sangue seco na roupa e na cara”. Ao ser preguntado polo ocorrido, o home admitiu que tivera unha discusión cunha veciña, aínda que negou que a golpeou, e atribuíu o sangue e os arañazos que presentaba ao feito de que estivera cortando herba nunha leira.

O xuízo concluirá o próximo 22 de abril, data na que está prevista a comparecencia dun perito médico da defensa (autor dun informe sobre a eventual mortalidade das feridas infligidas á muller), e na que tamén se presentarán as conclusións e informes finais. As acusacións solicitan 10 anos de cárcere por tentativa de asasinato, mentres que a defensa de Manuel N.C. reclama a súa libre absolución.

ÚLTIMAS

Trasladan a tres membros dunha familia en Vigo con síntomas de intoxicación por gas

Dous adultos e un menor tiveron que ser trasladados polos servizos sanitarios con síntomas...

Feministas católicas sean este domingo ás rúas de Vigo para reclamar que as mulleres teñan “voz e voto” na Igrexa

Feministas católicas da Revolta de Mulleres na Igrexa sairán este domingo 3 de marzo ás...

Remolcan ao porto de Vigo ao portacontedores ‘MSC Katyanyi’

O portacontedores 'MSC Katyayni,', que navega baixo bandeira de Panamá, está a ser remolcado...

Rueda reivindica a Arribada de Baiona para a desestacionalización do turismo en Galicia

O presidente da Xunta en funcións, Alfonso Rueda, destacou este venres a importancia de...