UGT en Pontevedra denunciou que persoal de distintos colectivos que traballan na Unidade Asistencial de Drogodependencias de Vigo (CEDRO) están a sufrir “discriminación” respecto da vacinación fronte ao covid-19.

Nun comunicado, o sindicato remarcou que mentres os sanitarios, terapeutas, psicólogos, traballadoras sociais e persoal de farmacia “xa foron vacinados”, hai outro persoal que aínda non o foi e que continúa realizando os seus labores “sen ningún tipo de protección”.

En concreto, referiuse ao persoal de limpeza, seguridade, administración, educadores e monitor de ximnasia, para os que reclamou “que cese xa a discriminación”. Que “en todos os centros sanitarios e sociosanitarios leve a cabo a vacinación de todo o persoal, sen ningún tipo de exclusión”, reclamou.